Historie MIP

De 6 koppige groep Men in pek is in 2003 ontstange oet de toenmalige 3 duo’s : Ed & Arie, Net gein trio en 2 Groeëte. Of te waal Ed, Arjan, Hugo, Ronald, Jac en Jack. Dit gebeurdje spontaan, òmdet men vònj dèt d’r net get te weinig opgaves wore veur de leedjesaovendj van `t sezoên 2004. Òmdet Arjan, Jac en Jack as aod prîns van V.V. De Zoatmaale de besjikking haje euver ein sjoeën zwart pak, waas de naam “Men in pek” al gauw ein feît. `t Ieërste leedje woord gemaâktj en kreeg de titel: “Dreije”, waat oppe leedjesaovendj beloeëndj woord mèt ein 2e plaats, dao zeen d’r die veur minder zeen begònne. De smaak òm mèt zien 6e zinge, preufdje nao mier, en in Rooj waas dan ouch geine eine microfoon mieër veilig. Mer good det de meîste cafe’s gein 6 micro’s hebbe, want dan waas hie-en-doa zéker eine speaker gesneuveld, door `t volume waat dees6 kaelke’s te weeg kònne bringe. Nao de 2e plaats van 2003, ginge wae in 2004 op vakantie in Griekenlândj, en krege zoeë de inspiratie veur `t 2e Men in Pek leedje “Aphrodite”, waat os oppe Leedjesaovendj in Rooj wederom en 2e plaats opleverdje. Wae mochte kome zinge bie `t Luiperke wat ze oûch drek hebbe gemerktj ane beer òmzèt. In 2005 heet Ed “Men in pek” verlaote, en hebbe wae Marco bereidj gevònje òm os 6 –tal weer komplieët te make. Waat neme toen wist, mer Marco waal, waas dèt hae in 2005 oûch Prîns vanne Zoatmaale ging waere, dus ein zwart pak waas gein probleem. Det zelfdje jaor sjoot St. Ketrien oet Rooj de Aoje Limburger en de os 3e leedje ”Potpourri vanne Sjùtterie” waas ein feit. Noe weurtj ‘t ein bitje eintoeënig, mer alwéér ein 2e plaats oppe leedjesaovendj vanne Zoatmaale. Met `t leedje “Six-pek” vertèldje wae de minse det wae eigelijk veur altiêd wichter woeëje bliêve, en ouch dit 4e leedje waas good veur ein 2e plaats in Rooj. Mèt 4x ein 2e plaats as gevolg zeen wae in 2007 veur `t ieërst boete de grenze van os eige Rooj gaon kieke en hebbe wae Mark Fonteijn wete te strikke òm veur os de muziek te make, waat wae veuraaf in eige beheer deje, same mèt Rolph en Harrie Broens. Oppe Leedjesaovendj van 2007 presenteerdje wae os 5e leedje “Heej Ober“; ein ierbetoeën aan alle obers. Dit woord door de obers mèt ein applaus ontvange en door de jury wederom mèt ein 2e plaats beloeëndj. Woeë ging `t mis ? wore wae echt de ieëwige 2e, of wore wae soms wiêt wèg familie van Joop Zoetemelk? `t Feit bleef det wae nao 5x ein 2e plaats, beslote om op oze zwarte blouse ein groeëte witte “2” te laote drökke. Zoeëdet ouch ederein kos zeên det wae `t wore. Floor en Sanne wònne in 2006 ’t MLLF in St. Odiliënberg dus mocht Rooj dit organisere in 2007. In ein bomvôl gemeinsjapshoês mochte wae ein gast optraeje doôn, en hebbe wae veur 800 mân oet midde Limburg os 5 leedjes moge zinge. Waat ein geweldjige ervaring waas det. Veur os 6e leedje “Rustig aan“ hebbe wae bepaoldj neet rùstig aan gedaon en hebbe wae mèt zien zèsse eine hieële daag door de Karnevalswierts gerendj en pek gepastj. Oeteindelik hebbe wae dit leedje gezònge in lekker werm kozakkepek oet Ruslândj, en zeen wae (de mân) dae leedjesaovendj minstes 2 kilo aafgevalle. Wae haje knap zélf eine six-pek! Of `t noê aan de six-pek loog, dèt kozakkepak, of gewoeën aan os ieëwige enthousiasme, mer os 6e leedje “Rustig aan“ waas eindelik good veur ein 1e plaats oppe 22e Roojer jubileum leedjesaovendj. Dao stònge wae dan mèt ein groeëte “2” oppe rök !!!. God zei dank (det zagt hae écht…) waas `t oze eige Ronald, dae det joar prîns bie de Zoatmaale woôrd, en koste wae Ronald én os zelf traktere op noe blouse mèt ein noe M.I.P. logo. De vastelaovendj 2008 hebbe wae bezònge as of os laeve d’r vanaaf hing.
De Leedjesaovendj, `t MLLF, de Sjole vasteloavendj, bie de Eikkaters in Kessel-Eik en bie os eîge Roojer Ezel statuut. Waat ein fieëst! In 2009 ginge alle “Trosse Los” en os 7e leedje waas ein feît. Mèt ein spectaculaire pirate act inclusie houte beîn, wore wae good veur ein 3e plaats. Veur de wiskundige ònger os: eine kieër 3e, eine kieër 1e en 5 kieër 2e is gemiddeldj toch 2e ! Dit gemiddeldje beloeëndje de organisatie van de Boete Zitting oet Venlo mèt ein oetnuuëdiging òm te kome optraeje op alle podia op Vastelaovendj zaoterdig in 2010. Deze daâg heet op os allemaol, as echte Vastelaovesveerders, eine onoetwisbare indrök achtergelaote. Oppe trökweêg inne treîn hebbe wae beslote, dèt wae os 8e nummer op gaon steûre nao `t LVK. Os 8e leedje “Hutje mutje” is opgenome en ingezònge bie Marlstone en woord 13 november vlee jaor gepresenteerdj oppe 24e Roojer Leedjes Aovendj.Koste wae mèt dit nummer oos gemiddeldje omhoeëg koste kriêge…? Baeter zelfs, Wae werde unaniem door de vakjury verkoze tot WINNAAR vanne leedjsaovendj! Op nao ‘t MLLF in Kelpe! En dao waas ‘t fieëst. Mèt ein bös fans vôl inne aanslaâg, bewaopendj mèt eine groeëte pot beer en ein gezònj spanning behaaldje wae, lèt op…:
veur de 2e kieër ein 2e plaats!!! Fans, bedânkt veur eure support!
2011..gewaopendj mèt ‘t nummer “Blauw plekke” gesjeve door (!) Peter Jansen en Wim Janssen (“Deh dan…dao isse”) en opgenome bie Marlstone wònne wae bie os de leedjesaovendj. Hie-mèt ginge wae nao ‘t MLLF bie de Katers in Maasneel. Mèt ein 3e plaats mòste wae Spik & Span en Òm in te liêste veur laote gaon mer ‘t waas alwéér eine gezellige aovendj.
Wae sjiêve inmiddels 2012. Peter en Wim zeen drök veur os inne weer gewaesj en hebbe d’r eine knaller van gemaâkt…”Eh…LALALA” mòt ‘t dit jaor veur os gaon make.
Mer de concurrentie in eige dörp loog d’r neet òm (drie leedjes oet ‘t Zoatmaaleriêk hebe de halve finale gehaaldj van ‘t LVK 2013!) De oetslaâg vanne jury bracht verlossing: Veur de 3e kieër op rie: 1e plaats!
Op nao Söstere! Mèt ein delegatie van zoeë’n 40 mân presenteerdje wae oos leedje aan Midde Limburg. Naodet de score van eder jurylid waas gepresenteerd à lá Songfestival stònge wae same mèt Naer (Òm in te liêste) op ein gedeildje 1e plaats. De jury trok zich efkes trök en kwaâm mèt eine noewe oetslaâg omdet bleek det men zich vertèldj zooj hebbe. Dit sjool 3 peuntje in oos naodeîl dus gae roadj ‘t al…2e plaats…(goh…)
veur 2014 helaas gein MLLF veur os door get nuuëdige vakanties. Waal hebbe wae os van eine goje kântj laote kieke tiejes de LVKA: De Limburgse Vereniging Karnavals Artiesten, Stichting Organisatie Buutteredners Kampioenschappen. Ein hieël sjieke ervaring woeëveur wae hieël gaer nog ins wille zinge! Veur oze noewe vastelaovesplekker “Carnelaovendj” hebbe wae de Playmobil veurraod vanne wichter mòtte aanspraeke…Veur dees clip zeen 1111 foto’s gesjote en wae hebbe nog ins aojerwèts mèt de Playmobil kònne speule…. “Carnelaovendj” is ein typisch traditioneelgetrouw vastelaovesleedje det oetlègkdj det d’r gein versjil is tösse “Vastelaovendj” en “Carnaval”. Wae vere toch zeker allemaol ‘t zelfdje fieëst??? want dét is wie vastelaovendj mòt zeên!…of isj toch canaval…of eh, vasteval…carnalaovendj…?….zegk ‘t zelf 11x en de wètst ‘t ouch neet mieër…!
Veur 2015 richte wae oos piêle op ‘t wederom door Peter Jansen en Wim Janssen gesjreve leedje: “Veur gein gêldj”. Ònger titel van ‘t leedje is feitelijk, “ich zooj veur gein gêldj miljonair wille zeên”. Want det is precies woeët ‘t òm dreitj: Gêldj maaktj neet gelökkig, plezeer waal! En asse dien plezeer dan ouch nog ins deilst mèt anger hebse döbbel zoeë völ laôl! ….wie simpel kântj laeve toch zeên….